Euskal gramatika: egiturak eta osagaiak (EGEO) hizkuntza deskribatu arren, arazo teorikoei ere muzin egiten ez dien gramatika bat da; euskararen datuak gogoeta teorikoarekin tartekatzen dituena. EGEOk atarikoaz gain, hamar kapitulu ditu, hizkuntzaren osagai nagusiak eta osagaiok sortarazten dituzten egiturak arakatzen dituena, hala nola, izena eta izen sintagma edo adposizio eta adposizio sintagma.
EGEO bereziki lagungarria gerta daiteke euskal gramatikan trebatzen hasiak diren unibertsitateko ikasleentzat. Bestalde, gramatikagintzan eskarmentua duten hizkuntzalariek irakasteko lanabes gisa balia lezakete EGEO. Azkenik, euskararen eta oro har, hizkuntzaren osagaiez eta egiturez jakin-mina duen edozein irakurlek nabiga dezake EGEOn zehar Patxi Goenagaren eskutik.
