II Premio UDC sustentabilidade a traballos fin de grao e mestrado 2019

Abstract

Recollemos nesta colección os oito traballos premiados no que foi a segunda edición do Premio UDC Sustentabilidade a Traballos de Fin de Grao e Mestrado, correspondente ao ano 2019. A resolución desta convocatoria fíxose pública o 5 de xuño de 2020, Día Mundial do Medio Ambiente, e con ela a UDC celebrou a efeméride sen a calor dun acto presencial, no momento da saída do período de estrito confinamento requirido pola alarma sanitaria da COVID-19. Un ano antes a UDC emitía unha declaración institucional relativa ao estado de emerxencia climática e ecolóxica do planeta. Nesta nova situación, toda a humanidade percibiu a punta do iceberg dos graves prexuízos que nos trae a destrución da biodiversidade. Velaí o recoñecemento do problema ambiental, xunto co do cambio climático e o esgotamento dos recursos e a contaminación, como verdadeiro desafío das xeracións actuais. Un desafío de dimensión universal e local a que a UDC non debe nin pode permanecer allea.