A época silente

Abstract

Esta unidade didáctica afonda nos primeiros anos do cinema, concretamente na época silente do mesmo, como parte da programación da materia Historia do Cinema e outras Artes Audiovisuais do grao en Historia da Arte da Universidade de Santiago de Compostela (6 créditos ECTS, Materia Ordinaria Grao RD 1393/2007). A unidade didáctica aspira a sentar as bases para a comprensión da posterior historia, lingüística e estética do cinema e a imaxe en movemento, así como a achegar os principais conceptos teóricos, sociais, económicos e culturais do período, a comprender o medio na súa dimensión estética e industrial, a definir as características e achegas máis sinaladas dos nomes centrais desta historia e a dotar de ferramentas interpretativas, analíticas e críticas sobre o medio audiovisual. Para isto, analizaranse as imaxes inaugurais do cinema e os distintos contextos nos que se desenvolveu esa historia (o cinema narrativo de Griffith, o cinema alemán, o cinema da Revolución Soviética, as vangardas artísticas e cinematográficas, o cinema estadounidense...) ata o momento do tránsito ao cinema sonoro. Asemade, propón revisar tal historia dende os debates dados polo cinema e a historia, o cinema e as outras artes e o feminismo.