Herritar globalarentzako eskuliburua

Abstract

Liburu hau italieraz eta gaztelaniaz argitaratu zen lehenengo aldiz. Euskarazko edizio honek lanaren egitura gorde du, baita gizateriak aurrez aurre dituen arazoen eta erronken karakterizazioa ere, Roberto Savio eta Giuliano Rizziren ikuspegi egokia mantenduz.

Edizio honetan, lanaren edukia Euskadiko irakurlearengana hurbiltzeko informazioa eta adibideak ematen dira, mundu global honetan arazoak planeta mailakoak direla aitortzen dugulako, nahiz eta eskualde bakoitzean berezko agerpen eta ñabardurak badiren. Era berean, jatorrizko bertsioaren ingelesezko eta italierazko grafiko gehienak euskaratu dira.

Funtsean, Saviok eta Rizzik egindako gogoeta guztiak ia hitzez hitz ekarri dira; hala ere, Italiari buruzko erreferentzia batzuk alde batera utzi dira edo laburtu egin dira, bertakoegiak edo Europako adibide oso mugatuak baitziren. Gogoeta horiek Euskadirako baliagarriak direla uste dugu.

Bi idazleek esan bezala, liburu honen xedea ez da errezetak ematea edo gazteak induzitzea jarrera jakin batzuk har ditzaten, baizik eta kezkak, haserrea eta itxaropenak sortzea, ondorioetatik abiatuta, aldaketaren aldeko borrokarekin bat egiteko.