A unidade didáctica A familia en perspectiva histórica. Concepto, estrutura e evolución impártese no segundo curso do grao en Educación Social da Universidade de Santiago de Compostela, concretamente na materia Familia, Escola e Comunidade na Educación Social, que ten carácter obrigatorio e unha carga lectiva de seis créditos ECTS consonte o Real Decreto 1393/2007 (BOE n.º 260, de 30 de outubro de 2007). A presente unidade encadrada no primeiro módulo da mencionada materia aborda a familia desde unha perspectiva dinámica e histórica, facendo referencia á deconstrución do concepto estereotipado tradicional, ás etapas do ciclo familiar, ás principais estruturas familiares e aos factores de risco e protección existentes no seu seo. Tamén estuda a dinámica evolutiva da mesma, centrando o foco en España de xeito xeral e en Galicia de maneira particular.
