Tendencias actuais na xestión dos recursos humanos

Abstract

As organizacións están suxeitas aos constantes cambios que se producen no contexto organizativo, a incertidume, a complexidade, a globalización dos mercados e a presión competitiva, polo que é necesario establecer novas formas de xestión para poder afrontalos adecuadamente. Así, a xestión dos membros da organización pode ser un factor clave na competitividade das empresas e, polo tanto, na súa propia supervivencia ao proporcionar as habilidades, competencias e coñecementos necesarios. Por conseguinte, a xestión estratéxica das persoas da organización constitúe unha actividade imprescindible no ámbito empresarial, cuxo desempeño afecta á eficiencia e eficacia de empresas e organizacións. A materia dirección e xestión de recursos humanos, de carácter obrigatorio, pertence ao segundo curso do grao en Relacións Laborais e Recursos Humanos da Facultade de Relacións Laborais. A súa carga lectiva é de 6 ECTS e impártese no primeiro cuadrimestre. O obxectivo é presentar ao alumnado unha visión ampla sobre a importancia das persoas no ámbito empresarial e reflexionar sobre os coñecementos, as habilidades e as técnicas vencelladas coa súa xestión no contexto organizativo. En particular, esta unidade didáctica céntrase na situación actual da xestión dos membros da organización a través da análise dos diferentes cambios experimentados pola propia organización, a súa contorna e as persoas que traballan nela. Asemade, abórdase a importancia e o valor da xestión estratéxica das persoas. Finalmente, examínanse as diferentes prácticas de recursos humanos en relación ao rendemento organizativo.